ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ހިދުމަތް ދ. އަތޮޅުގައި ފަށައިފި
ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓު، ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމުގެ މަސައްކަތް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިފްތިތާޙުކުރައްވައިފިއެވެ. މި ޚިދުމަތް އިފްތިތާޙުކޮށްދެއްވާފައިވަނީ މިކަމަށް ޚާއްޞަކޮށް، މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ޖަލްސާއެއްގައެވެ.
ދ. އަތޮޅު ކައުންސިލްގެ އިދާރާއިން މަޢުލޫމާތު ދެއްވިގޮތުގައި، މި ހިދުމަތް ފެށުމާއެކު ދ. އަތޮޅުގެ ރައްޔިތުންނަށް ޕާސްޕޯޓު ހެއްދުމާއި އާކުރުމުގެ ހިދުމަތް ލިބެން ފަށާނެއެވެ. މިއީ އަތޮޅުގެ ރައްޔިތުންނަށް ވަރަށް ބޮޑު ލުއިފަސޭހައެއް ލިބިގެންދާނެ ކަމެއް ކަމުގައި ކައުންސިލުން ފާހަގަކުރެއްވިއެވެ.
މޯލްޑިވްސް އިމިގްރޭޝަނުން ވިދާޅުވިގޮތުގައި، މި ހިދުމަތް ދިނުމަށްޓަކައި ދ. އަތޮޅު ކައުންސިލްގެ ފަރާތުން ފުރިހަމަކުރަންޖެހޭ އެންމެހާ ކަންތައްތައް ވަނީ ފުރިހަމަކުރައްވާފައެވެ. އަދި ޕާސްޕޯޓު ހެދުމަށް ބޭނުންވާ އެންމެހައި ވަސީލަތްތައް ދ. އަތޮޅު ކައުންސިލުން ހޯދާ އަދި މިކަމުގައި މޯލްޑިވްސް އިމިގްރޭޝަންއިން ފޯރުކޮށްދެންޖެހޭ އެންމެހާ ކަންތައްތައްވެސް ފޯރުކޮށްދެވިފައިވާ ކަމަށްވެސް އިމިގްރޭޝަނުން ހާމަކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ މިފަދަ ހިދުމަތްތައް އަތޮޅުތަކުގައި ޤާއިމުކުރެވިގެންދިއުމަކީ ސަރުކާރުގެ ލެ ލާމަރުކަޒީ ސިޔާސަތުގެ މުހިންމު ބައެއް ކަމަށެވެ. އަދި ކުރިއަށް އޮތް ތަނުގައި އިތުރު އަތޮޅުތަކުގައިވެސް މިފަދަ ހިދުމަތްތައް ފެށިގެންދާނެ ކަމުގެ އުންމީދު ފާޅުކުރެއްވިއެވެ.
މި ހިދުމަތް ފެށުމާއެކު، ދ. އަތޮޅުގެ ރައްޔިތުންނަށް މާލެއަށް ދަތުރުކުރުމަކާ ނުލައި ޕާސްޕޯޓާ ގުޅޭ ހިދުމަތްތައް ލިބިގެންދާނެއެވެ. މިއީ ވަގުތާއި ޚަރަދު ސަލާމަތްވެގެންދާނެ ކަމެއްގެ ގޮތުގައި ގިނަ ފަރާތްތަކުން ފާހަގަކުރެއެވެ.