ދ. އަތޮޅު ކައުންސިލުން އެފް.އޭ.އެމް ނޯމަލައިޒޭޝަން ކޮމެޓީގެ ޗެއަރމަން އަހުމަދު ޒުހޫރާއި ބައްދަލުކޮށް ފުޓުބޯޅަ ކުރިއެރުވުމާ ގުޅޭގޮތުން މަޝްވަރާކޮށްފި
ދ. އަތޮޅު ކައުންސިލުން އެފް.އޭ.އެމް ނޯމަލައިޒޭޝަން ކޮމެޓީގެ ޗެއަރމަން އަހުމަދު ޒުހޫރާއި ބައްދަލުކޮށް، އަތޮޅުގެ ފުޓުބޯޅަ ކުރިއެރުވުމާ ގުޅޭގޮތުން މަޝްވަރާކޮށްފިއެވެ. މި ބައްދަލުވުން ބޭއްވުނީ އިއްޔެ ދ. އަތޮޅު ކައުންސިލްގެ އިދާރާގައެވެ.
އެފް.އޭ.އެމް ނޯމަލައިޒޭޝަން ކޮމެޓީގެ ޗެއަރމަން ދ. އަތޮޅަށް ކުރެއްވި މި ދަތުރަކީ ކުޑަހުވަދޫގައި ކުރިއަށްދިޔަ އެމް.ޕީ ކަޕްގެ ފައިނަލް މެޗް ޝަރަފުވެރިކޮށްދިނުމުގެ ގޮތުން ކުރެވުނު ދަތުރެކެވެ. މި ފުރުސަތުގައި އަތޮޅު ކައުންސިލުން އެދިލައްވައިގެން ޗެއަރމަން އަތޮޅު ކައުންސިލާ ބައްދަލުކުރެއްވިއެވެ.
މި ބައްދަލުވުމުގައި އަތޮޅުގެ ފުޓުބޯޅަ ކުރިއެރުވުމަށް ކުރެވިދާނެ ކަންކަމާ ގުޅޭގޮތުން މަޝްވަރާކުރެވުނެވެ. ޚާއްޞަކޮށް ރަށު ފެންވަރުގައި ފުޓުބޯޅަ އިތުރަށް ކުރިއެރުވުމަށް ކުރެވިދާނެ ކަންކަމާ ގުޅޭގޮތުން ވެސް މަޝްވަރާކުރެވުނެވެ.
ޗެއަރމަންގެ ވާހަކައިގައި މި އަތޮޅުގައި ހުނަރުވެރި ކުޅުންތެރިންތަކެއް ތިބިކަން ފާހަގަކުރެއްވިއެވެ. އަދި ބޭނުންވަނީ މި ކުޅުންތެރިންގެ ފެންވަރު ރާއްޖެއަށް ދައްކާލުން ކަމަށް ވިދާޅުވިއެވެ.
މިގޮތުން އެފް.އޭ.އެމް ނޯމަލައިޒޭޝަން ކޮމެޓީއިން މިހާރު ވިސްނާފައިވަނީ އަތޮޅު އެސޯސިއޭޝަންގެ ނަމުގައި ޖަމްޢިއްޔާއެއް ހަދައި އަތޮޅު ފެންވަރުގައި ކުޅިވަރު ތަރައްޤީ ކުރުން ކަމުގައި ޗެއަރމަން މަޢުލޫމާތު ދެއްވިއެވެ. މި އެސޯސިއޭޝަންތަކުގެ މެންބަރުންގެ ގޮތުގައި އަތޮޅުގައި ރަޖިސްޓަރީކޮށްގެން ހިންގާ ކުލަބުތަކުން ބައިވެރިވާނެ ކަމަށާއި، މި އެސޯސިއޭޝަނަށް އެފް.އޭ.އެމްގެ ކޮންގުރެސްގައި ވޯޓުދިނުމުގެ ޙައްޤު ލިބޭނެ ކަމަށް ވެސް އޭނާ ވިދާޅުވިއެވެ.
އަތޮޅު ކައުންސިލުން މިކަމުގައި އިސްނަގައި ދިނުމަށް އެދިލައްވާފައިވާ ކަމަށް ކައުންސިލުން މަޢުލޫމާތު ދެއްވިއެވެ. ކައުންސިލްގެ ރައީސްގެ ވާހަކައިގައި އަތޮޅުގެ ކުޅިވަރު ތަރައްޤީ ކުރުމަށް އަބަދުވެސް އަތޮޅު ކައުންސިލުން އިސްކަންދޭކަން ވަނީ ފާހަގަ ކުރައްވާފައެވެ. އަދި އަތޮޅު އެސޯސިއޭޝަން އުފެއްދުމުގެ ކަންތައްތައް ބާރަށް ކުރިއަށް ގެންދަވާނެކަން ވެސް ވަނީ ފާހަގަ ކުރައްވާފައެވެ.