ދ. މިނިމަސްގަލި އަދި ފެންފުށި އަތޮޅު ކައުންސިލާ ހަވާލުކޮށްފި
މާލީގޮތުން ކައުންސިލްތައް ބާރުވެރިކުރުވުމަށްޓަކައި، ފަޅުރަށްރަށް ކައުންސިލްތަކާ ހަވާލުކުރުމުގެ މަސައްކަތުގެ ދަށުން، މިއަދު މި ކައުންސިލާ ދެ ރަށެއް ހަވާލުކޮށްފިއެވެ. މިގޮތުން ހަވާލުކޮށްފައިވަނީ ދ. މިނިމަސްގަލި އަދި ދ. ފެންފުށި އެވެ.
މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސްއާއި މިނިސްޓްރީ އޮފް ފިނޭންސް އެންޑް ޕްލޭނިންގ ގުޅިގެން ކުރިއަށްގެންދާ މި މަސައްކަތުގެ ދަށުން، މިއަދު މިނިސްޓްރީ އޮފް ފިނޭންސް އެންޑް ޕްލޭނިންގގައި ބޭއްވުނު ރަސްމިއްޔާތެއްގައި މި ދެ ރަށް ހަވާލުކުރުމުގެ އެއްބަސްވުމުގައި ސޮއިކުރެވުނެވެ.
މި އެއްބަސްވުމުގައި މި ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަޙްމަދު ޝާފިއު އެވެ. މި އެއްބަސްވުމުގެ ދަށުން، މި ކައުންސިލަށް ލިބޭ ދެ ރަށް ތަރައްޤީކޮށް، އޭގެ މަންފާ ރައްޔިތުންނަށް ލިބޭނެ ގޮތް ހެދުމުގެ ފުރުޞަތު ލިބިގެންދާނެއެވެ.
ސަރުކާރުން މިފަދަ މަސައްކަތްތައް ކުރިއަށް ގެންދަނީ ރާއްޖޭގެ ރަށްތަކުގެ ކައުންސިލްތައް މާލީގޮތުން ބާރުވެރިކުރުވައި، ރަށްރަށުގެ ތަރައްޤީއަށް ބޭނުންވާ ވަސީލަތްތައް ހޯދައިދިނުމަށެވެ. މިކަމުގެ ސަބަބުން ރަށްރަށުގެ އިޤްތިޞާދީ ޙަރަކާތްތައް އިތުރުވެގެންދާނެ ކަމަށް ބެލެވެއެވެ