ދ. އަތޮޅު ކައުންސިލްގެ އިދާރާއިން އައި.ޑީ ކާޑު ޕްރިންޓްކުރުމުގެ ޚިދުމަތް ފަށައިފި
ދ. އަތޮޅު ކައުންސިލްގެ އިދާރާއިން ދިވެހިރައްޔިތެއްކަން އަންގައިދޭ ކާޑު (އައި.ޑީ ކާޑު) ޕްރިންޓްކުރުމުގެ ޚިދުމަތް މިއަދު ރަސްމީކޮށް ފަށައިފިއެވެ. މި ޚިދުމަތް އިފްތިތާޙުކޮށްދެއްވީ މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ޢަލީ އިޙްސާނެވެ.
ދ. އަތޮޅު ކައުންސިލްގެ އިދާރާގައި ބޭއްވުނު މި ރަސްމިއްޔާތުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އާދަމް ޝަރީފް ޢުމަރު އަދި މިނިސްޓްރީގެ އިސް ވެރިންގެ އިތުރުން އަތޮޅު ކައުންސިލްގެ މެންބަރުންނާއި ކުޑަހުވަދޫގެ މުއައްސަސާތަކުގެ ވެރިން ބައިވެރިވެވަޑައިގެންނެވިއެވެ.
މިރަސްމިއްޔާތުގައި ވާހަކަ ދައްކަވަމުން ދ. އަތޮޅު ކައުންސިލްގެ ރައީސް ވިދާޅުވި ގޮތުގައި، މި ޚިދުމަތް ފެށުމަކީ އަތޮޅުގެ ތަރައްޤީއަށް އެޅޭ މުހިންމު ފިޔަވަޅެކެވެ. އަދި ކުރިއަށް އޮތް ތަނުގައި އިތުރު ޚިދުމަތްތައް ވެސް އަތޮޅު ތެރެއިން ފޯރުކޮށްދިނުމަށް ރޭވިފައިވާ ކަމަށް އެމަނިކުފާނު ވަނީ ހާމަކުރައްވާފައެވެ. އަދި ރަށްޔިތުންނާއި ގުޅޭ މިފަދަ ކަންތައްތަކުގައި އަތޮޅު ކައުންސިލުން އަބަދުވެސް މަސައްކަތްކުރާނީ ރަށުގައި ތިބެގެން ހިދުމަތައްތައް ލިބޭނެ ގޮތްތަކަށް އިންތިޒާމުތައް ހަމަޖެއްސުމަށްކަމަށެވެ.
ދ. އަތޮޅު ކައުންސިލްގެ އިދާރާއިން މަޢުލޫމާތު ދެއްވިގޮތުގައި، ރައްޔިތުންނާ ގުޅުންހުރި މުހިންމު ޚިދުމަތެއްކަމަށްވާތީ، މި ޚިދުމަތް ފެށުމަށްޓަކައި އަތޮޅު ކައުންސިލުން ވަނީ ބޮޑު ހޭދައެއް ކޮށްފައެވެ. މި ޚިދުމަތް ފެށުމުގެ ސަބަބުން، ދ. އަތޮޅުގެ ރައްޔިތުންނަށް އައި.ޑީ ކާޑު ހެއްދުމަށް މާލެ ދަތުރުކުރަން ނުޖެހި، އަތޮޅުގައި ތިބެގެން މި ޚިދުމަތް ލިބިގެންދާނެއެވެ.
ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން ބުނިގޮތުގައި، މި ޚިދުމަތް ފެށުމަކީ ސަރުކާރުގެ ލާމަރުކަޒީ ސިޔާސަތުގެ ދަށުން އަތޮޅުތަކަށް އިތުރު ބާރުތަކެއް ދިނުމުގެ މަސައްކަތުގެ ތެރެއިން ކުރެވުނު މުހިންމު ކަމެކެވެ. މި ޚިދުމަތް ފެށުމާއެކު، ދ. އަތޮޅުގެ ރައްޔިތުންނަށް ފަސޭހަކަމާއެކު އައި.ޑީ ކާޑާ ގުޅޭ ޚިދުމަތްތައް ލިބިގެންދާނެކަމަށް އުންމީދުކުރެވެއެވެ.